Davvi kulturárbi lea Sámedikki, Romssa fylkkasuohkana, Oarje-Romssa Musea ja Várdobáikki musea ovttasbargoprošeakta man ulbmil lea oktasaččat loktet davvi kulturárbbi. Riikaantikvára lea ruhtadan prošeavtta árvoháhkanruđaiguin ja ásahusat leat ieža bidjan ollu návccaid prošektii.
Ovttasbargobealit galget ovttas ásahit báikkálaš nevvohaga priváhttaolbmuide ja suohkaniidda Oarje-Romssas mat eaiggádit dahje main lea ovddasvástádus kulturbirrasiidda ja gáhttenárvosaš visttiide. Dát galgá movttiidahttit báikkálaš árvohuksemii, ássanmoktii ja galgá leat mielde rekruttereme duojáriid ja hukseme nanu gelbbolašvuođabirrasiid.
Prošeakta galgá dasto čohkket geavaheddjiid, eaiggádiid, árbevirolaš duojáriid ja earáid geain lea ovddasvástádus hálddašit kulturárbbi davvin, aktiivvalaš fierpmádathuksema, gelbbolašvuođaloktema ja ovttasbarggu bokte miehtá Davvi-Norgga.
Dan oktavuođas almmuheigga Sámedikki ráđđelahttu Runar Myrnes Balto ja Romssa fylkkasuohkana kultuvrra ja dearvvašvuođa váldolávdegotti jođiheaddji, Eirik Losnegaard Mevik, neahttasiiddu www.kulturarvnord.no.
– Buoremus gal ferte leat beassat orrut kulturárbbis. Ollu priváhttaolbmot eaiggádit visttiid maid sáhttá divodit, ja vistegáhtten ja ođđasis geavaheapmi leat dehálaš ja guovddáš árvvut. Birrasii lea buorre go áimmahuššá ja divoda boares visttiid. Davvi kulturárbbi ulbmil lea ge movttiidahttit ja áimmahuššat boares kulturárbbi. Dat galgá álkidahttit ja movttiidahttit divodit boares visttiid vai dain sáhttá orrut, dajai Sámedikki ráđđelahttu Runar Myrnes Balto.
– Boaldimiid geažil jagis 1944 lea dađi bahábut ollu kulturárbi Návuonas jávkan, ja dasto maiddái vejolašvuohta čájehit dan iežas mánáide, danne ipmirdan mun man dehálaš lea váldit vára kulturárbbis mii ain gávdno. Romssa fylkkasuohkan lea giitevaš vejolašvuođa ovddas maid dát ovttasbargu buktá, vai eambbosat fylkkasuohkana ássiin válddáše oasi kulturárbbi seailluheamis, dajai Romssa fylkkasuohkana Eirik Losnegaard Mevik.
Neahttasiiddu sisdoallu ovdanbuktojuvvui buot dan 30 olbmui geat ledje boahtán. Sihke Várdobáikki musea ja Oarje-Romssa musea almmuhedje jagi 2024 geasi ja čavčča kursaplánaid. Nugo kursa konstrueret bealljegoađi, loavdit bessiin, guolevuodjamálemis ja divvut lásiid.
Várdobáiki sámi guovddáš guossohii njálgga beaiveborramuša, seammás go olbmot besse geahčadit árbevirolaš bargoneavvuid maid árbevirolaš duojárat geavahit.
Buohkat guldalit
Geahčadit árbevirolaš bargoneavvuid